NOTICIAS DE LA COMUNIDAD EDUCATIVA DEL COLEGIO PÚBLICO "FEDERICO GARCÍA LORCA"DE GIJÓN (PRINCIPADO DE ASTURIAS)

martes, 8 de noviembre de 2016

NUECHE D´ÁNIMES



Nueche d’Ánimes
Refaciendo tradiciones.


De xuru que munches persones valoren que les neñes y los neños d’anguaño viven coses mui estremaes de les que vivíemos nós na infancia. Los xuegos, les costumes, les tradiciones y el mou de ver el mundo camudó enforma porque tamos nún tiempu onde lo global paez que ye más importante que lo cercano. Nes clases d’asturianu trabayamos porque esos pequeños regalos que nos dan les tradiciones de nueso vuelvan a tornar a la vida y dámos-yos puxu pa que la tresmisión cultural llegue también al nuesu alumnáu. Dende esta ventana queremos compartir con vos esti trabayu que vinimos desendolcaldo nes últimes selmanes. Esperamos que vos preste.
La Nueche de les ánimes trátase d’una celebración de raigaños celtes, la más importante de les qu’estos pueblos celebraben a lo llargo del añu. Etimolóxicamente, Samhain, en gaélicu, significa ‘final del branu’.

¿Qué se celebra?
L’añu nuevu celta; el pasu del branu al iviernu, cuando la escuridá gana a la lluz. Trátase d’una fiesta de transición y d’apertura al otru mundu.

¿Cuándo ye?
La nueche del 31 d'ochobre. Los pueblos celtes consideraben que por esta fecha los espíritus de los muertos tornaben al mundu de los mortales.

¿Vienen a facer daqué malo?
Non. Pue haber espíritus malos, a los que se-yos alloña con una serie de rituales, pero en realidá ye una xornada na que comunicar colos familiares y xente querido finada.

¿Qué rituales se faen?
Tradicionalmente, dexábase comida y agua fuera de les cases pa los difuntos, a los que se-yos atrayía mediante la lluz. Pa ello, nun primer momentu, agüecábense nabos pa meter fueu o veles nel so interior, anque llueu tamién se facía con calabaces. Gracies a estes aiciones, los difuntos saben llegar a les sos cases al mesmu tiempu que se protexe a la vivienda de los malos espíritus.

¿Estes tradiciones caltiénense n’Asturies?
Sí, anque nes ciudaes grandes tán mui contaminaes pola festividá de Halloween, de moda gracies al cine y la televisión. En dalgunos pueblos asturianos tovía se pueden ver calabaces nesta nueche allumando la puerta de les cases y los cruces de camín.

Pero, ¿ye lo mesmo Samhain que Halloween?
En realidá celebren lo mesmo, anque de diferente forma. El Halloween que conocemos ye la evolución que vivió l’añu nuevu celta nos Estaos Xuníos por mor de la emigración irlandesa. Al paecer, el so nome vien de ‘all hallow’s even’, vixilia de Tolos Santos, que camudó col pasu del tiempu a Halloween. Como de xuru yá conoces, los neños y neñes disfrácense de personaxes de terror y van peles cases pidiendo dulces. Esto último tamién lo facíen los rapacinos y rapacines asturianes, anque'l refugu de la Ilesia finó con esta tradición.




¿Y Tolos Santos?
Como pasó con otres munches celebraciones paganes, como colos solsticios, lo que fixo la Ilesia católica foi adaptaes al so gustu. Asina, Samhain o la Nueche de los Difuntos, como se conoz n'Asturies, pasó a la modernidá como la viéspora del Día de Tolos Santos, que se celebra’l 1 de payares. Nél se rinde cultu a los santos, anque la población, por cuenta de la tradición, tamién lo fai a los difuntos. Asina, anguaño nesti día ye habitual visitar los cementerios y poner una vela en casa. ¿Vos suena esto último?

¿Cómo se celebra esta fecha nel restu del mundu?
La celebración de Samhain ye asemeyada nos países de raigañu celta, anque Éire quiciabes ye’l país nel que meyor se conserva la tradición. Ellí faense grandes fogueres p’alloñar a los malos espíritus y la xente vive con muncha intensidá esti cambiu de ciclu. Dientro del Estáu, Galicia ye’l territoriu onde más fuercia caltién esta celebración. México, col Día de los Muertos, tamién tien espaciu nesta fecha, anque nesti casu, la tradición ye d’orixe mesoamericanu y non celta, y hasta la llegada de los conquistadores tenía llugar a primeros d’agostu, coincidiendo col novenu mes del calendariu solar mexicanu.

¿Cómo puedo celebrala yo?
Afuraca cola ayuda de la to familia una calabaza pa meter dientro una vela y déxala fuera de casa con dalgo de comida y agua. De xuru que los tos seres queríos que yá nun tan con nós van agradecételo


3 comentarios:

Unknown dijo...

Encántame! A partir del próximu añu, celebraremos la Nueche d'ánimes. Gracias por esta información tan interesante y prestosa 😃

Anónimo dijo...

Lo más prestoso ye ver al alumnáu involucrase nestes coses.

Unknown dijo...

http://www.lne.es/gijon/2017/01/30/languleru-embajadores/2049446.html 😊